Лупа астындагы объект: Евгений Боратынский йорты үзгәрешкә ничек әзерләнә
Бөек рус шагыйре Евгений Боратынский исеме белән бәйле легендар Казан йорты реставрацияләнәчәк. ТР Дәүләт экспертизасы федераль әһәмияттәге мәдәни мирас объектын саклау буенча эшләр проектын хуплады.
Шагыйрь турында истәлекне саклаучы музей
Боратынский йорты – XIX гасырның беренче яртысындагы торак архитектурасы үрнәге, Казан шәһәренең тарихи үзәге төзелешендә шәһәр барлыкка китерүче мөһим объект, Максим Горький урамы, 25/28 адресы буенча урнашкан.
Архитектор Фома Петонди проекты буенча төзелгән төп йорт Казан өчен бик сирәк очрый торган агач төзелеш сәнгате үрнәге булып тора, ул биек таш цокольгә куелган. Аны кырыс формалары, пилястрлы портик, триглиф фриз һәм парад залларының анфилад планировкасы аерып тора. Йортның икенче элементы – 1870 еллардагы ике катлы кирпеч янкормалы флигель.
Бүген архитектура һәйкәлендә гамәлдәге музей урнашкан – «Боратынский музее». Реконструкциядән соң бинаның функциональ билгеләнеше үзгәрешсез калачак.
Эшләрнең төп юнәлешләре
Татарстанның әйдәп баручы проект оешмалары тарафыннан эшләнгән проект ремонтка гына түгел, ә тарихи йөзен кайтаруга юнәлдерелгән фәнни-реставрация чаралары комплексын күздә тота.
Төп йорт: барлык төп элементларны саклап, ремонт ясалачак, стена һәм түшәмнәрнең штукатуркасы, архитектура декоры реставрацияләнәчәк, борынгы паркет торгызылачак һәм лак белән капланган булачак.
Флигель: проектта флигельнең агач өлешендәге фасадларның һәм түбәләрнең тарихи күренешен тулысынча торгызу каралган.
Инженерлык яңартулары: музейны уңайлы һәм имин заманча файдалану өчен электр һәм су белән тәэмин итү, су агызу, җылыту һәм вентиляция системаларын яңарту.
Төзекләндерү: йорт территориясен төзекләндерү эшләре башкарылачак, бу аның тарихи үзенчәлекләрен ассызыклаячак.