Патриарх Кирилл Казандагы эшлекле сәфәрендә Никола Тульский чиркәвендәге реставрация эшләрен карады
21 июльдә, Казан Изге Ана иконасы табылу көнендә, Казанга рәсми сәфәр белән Мәскәү һәм бөтен Русь Патриархы Кирилл килде. Сәфәр программасында шулай ук Казан Богородицкий ирләр монастыре территориясендә урнашкан Никола Тульский чиркәвендәге реставрация эшләрен карау да каралган.
Никола Тульский чиркәве - XIX гасыр башы архитектурасы һәйкәле, 1810-1816 елларда губерна архитекторы Яков Шелковников проекты буенча төзелгән. Бу монастырь ансамбленең борынгы заманнарда Казан Изге Ана иконасы сакланган иң әһәмиятле храмнарының берсе. Бүген чиркәү масштаблы реставрация проекты буенча торгызыла, аның экспертизасында ТР Дәүләт экспертизасы катнашты.
Патриарх сәфәренә кадәр объектны ТР Дәүләт экспертизасы экспертлары карады. Алар бинаның агымдагы торышы, проектның төп архитектура карарлары һәм торгызу эшләре технологиясе белән җентекләп танышты. Мондый практика экспертларга документацияне анализларга гына түгел, ә урында проект карарларының мәдәни мирасны саклау таләпләренә туры килүен бәяләргә мөмкинлек бирә.
Проект чиркәүгә XX гасыр башының тарихи йөзен кайтаруны күздә тота. Өченче катның соңгы совет өске корылмасын демонтажлау, гөмбәзне, колонналы портикларны, фасадларның декоратив элементларын торгызу, шулай ук интерьерларны 1810 елгы архив сызымнары нигезендә реконструкцияләү планлаштырыла.
Чиркәүнең эчке киңлеге тарихи планировканы исәпкә алып торгызылачак: алтарь өлеше, гөмбәзләр, хорга баскычлар, колонналар һәм лепка бизәге. Подвал катында ашханә һәм техник бүлмәләр — кухня, вентиляция камералары, ИТП һәм башка инженерлык узеллары каралган.
Заманча инженерлык системаларына — җылылык, вентиляция, су, электр белән тәэмин итүгә, шулай ук янгын куркынычсызлыгын тәэмин итүгә аерым игътибар бирелде. Бина шулай ук аз хәрәкәтләнүче гражданнар өчен дә җайлаштырылачак.
Никола Тульский чиркәвен реставрацияләү - Казанның рухи һәм мәдәни үзәген торгызуда мөһим этап.