Икътисадый нигезләнгән тарифлар – тотрыклы системага юл
2025 елның 14 апрелендә Казанда күпфатирлы йортлар белән идарә итү системасын камилләштерү мәсьәләләре буенча киңәшмә узды.
Чарада катнашучылар арасында ТР Төзелеш, архитектура һәм торак-коммуналь хуҗалык министрының беренче урынбасары Дамир Шәйдуллин, РФ Дәүләт Думасы депутаты Илшат Нуриев, Россия Төзелеш министрлыгының торак-коммуналь хуҗалыкны үстерү департаменты директоры урынбасары Дмитрий Нифонтов бар.
Киңәшмә кысаларында ТР Дәүләт экспертизасы директоры Рафар Шакиров республиканың муниципаль районнары буенча торак хезмәтләренә агымдагы тарифларга өлешчә анализ ясады. Анализ күрсәткәнчә, тарифлар күләме муниципаль районнарга карап сизелерлек аерыла: торак хезмәтләренең аерым төрләре буенча минималь һәм максималь күрсәткечләр арасындагы тайпылышлар 7-16 тапкырга җитә.
Шулай ук тарифларны яңадан карау датасында бертөрлелек юк — кайдадыр яңа күрсәткечләр ел башыннан (1 гыйнвардан), башка районнарда ел уртасыннан (1 июльдән) үз көченә керә. Болар барысы да торак хезмәтләренә тарифлар формалаштыруда Бердәм, үтә күренмәле һәм икътисадый яктан нигезләнгән алым булдыру кирәклеген күрсәтә.
Бу вәзгыяттә ТР Дәүләт экспертизасының ролен билгеләп үтәсе килә. Инде 10 елдан артык учреждение, торак фондының конкрет параметрларын исәпкә алып, идарәче компанияләр өчен торак хезмәтләре бәясен исәпләп чыгара.Дәүләт экспертизасын исәпләүләргә җәлеп итү берьюлы барлык якларга өстенлек бирә. Хакимият органнары өчен - ул халыкның социаль әһәмияткә ия чыгымнарын контрольдә тоту коралы. Идарәче компанияләр өчен-үз чыгымнарын һәм тәкъдимнәрен эксперт бәяләмәсе нигезендә дәлилләү мөмкинлеге. Ә халык өчен - гадел тарифлар һәм хезмәтләрнең тиешле сыйфаты гарантиясе.